احسن بيك يمي وانت

احسن بيك يمي وانت عني ابعيد
احسن بيك يمي وانت عني ابعيد
وانشدنك وكلك يا ضوه عيوني
ما ادري بحلم جنت انه لو جنيت
لو انت صدك يمي وتحاجيني
ابد ما غبت عني موطنك بالروح
احسك تمشي وي دمي بشرايني
كظيت الوكت بس الهج بطاريك
واحسن من اذكرك واهس يجيني
اتمنى العمر اكضيه بس وياك
مثل طفل بمهد وانت تناغيني
صدكني ابد ما اعيش انه بلياك
من تزعل اشوف الموت لافيني
احس انه بوجودك عايش بافراح
واشوف الجنه بعدك نار تجويني
مو عمري خلص نوح وبجي واهات
واجيت انت نهر بالفرح ترويني
اريدنك تظل تطفح علي خنياب
وخل مايك الدهله يعمر اسنيني
مو عمري كضه صبخه وملح واشواك
واجيت انت بتوالي العمر تحيني
تعال ولا تظن بعدك اعيش اهواي
لان جرحي بغيابك نزفه يدميني
صدكني من اشوفك كلشي بي ايطيب
واتحدى الدهر فنه اليلاويني
يا احلى حلم جاني بتوالي الليل
اخاف من الصبح غفله يصحيني
يا زخه مطر نزلت علي بكيظ
يا موكد جمر بالشتاء يدفيني
يا فرحة مسافر عاد بعد غياب
وانه الغايب واجيت انت تلاكيني
خليني ولك يمك بعد لاتروح
صدك من تروح الوحشه تغزيني
متعود اشوفك يمي ليل انهار
ولو لحظة غبت هجن سواديني
مااا راق لي